Soprano Ghada Ghanem's blog
… some of my short stories … شويّ من خباري

– دَقّة قديمة –

by admin

فهمنا إنو حابّين يحسّسونا بالوطنية الزايدة كل ما رنّ التلفون، هـَ التلات إيام!
بس شو خَصّ البرّاد بالبيت عنّا!
بلّش يعمل ذات الشي، كل ما فتحناه، وبيطلعلنا النشيد الوطني: “كلنا للوطن، كلنا يعني كلنا، إلخ..”
قولكم تلفون قصر بعبدا كمان عنده ذات الدقة؟
يا حرام، هي طريقة جديدة للحراك المافياوي، وقاحة ما بعد الوقاحة!
إنّو يعني في حسّ وطني، ما دام النشيد موجود!!! وفي حسّ بِوجود رأس الدولة ما دام في قصر جمهوري، حتى لو فاضي!!
مافيات البلد حاسة مع الناس بهاليومَين … هيدا خلاصة الدقّة!
وألله يسترنا من الدقّة اللي جايي بعد النشيد!
غ.

– السلام في المنطقة واللغة –

by admin

– سؤال خطير: هل تسعى أميركا للسلام في العالم؟
– جواب أخطر: نعم أميركا تسعى ونص الا خمسة…
مين عم بيترجملهم ومين عم بيعلّمهم عربي للأميركان؟
وصباحو
غ.

– انتبهوا يا جماعة –

by admin

طالع عِنّا شي بيشبه البني آدم وعم يتجوّل بيناتنا ومزنّر حاله بالمفرقعات…
مش طايق عيشته و واصلة معه لَأكتر منّا، وما بقى شايف لا قدّامه ولا وراه، وبدّه يفجّر حاله وما حدا إلو معه!!!
شايفين شي حيوان رايح ومخطّط يفجّر حاله بحيوانات من جنسه؟ ولا ممكن!
شو هيداااااا؟
وهلّق كيف يلّي مش عم بيلاقي حل لمشكلة متل الزبالة، يلاقي حلّ لَـ أشباه البني آدمين الفلتانين بيناتنا؟؟؟؟
قلبي مش كتير مطمّن هاليومين!
ألله يحمينا من اللي جايي!!!
منصلّي لكل اللي راحوا اليوم!
غ.

– ناطرة البَصَل –

by admin

رحت عند جورج الحلّاق اليوم…
– هو: طالع ع بالِك تدوقي لوبيات نهاد (مَرتُه)؟
– أنا: بدوق لقمة!
– هو: نطريني رح جيب بصل أبيض، هلق برجع!
… ورااااح جورج
… وأنا ناطرة البصل بالصالون عنده
وصرت قول لحالي:
معقول راسِك يا غادة؟ شو جايي تاكلي بالصالون لوبية بالزَيت ؟
وليش بيصير معي هيك مواقف أنا بالذات؟
غ ☺.

يا بَعْدِي

by admin

وقّفت ع الطريق وأخدتلكم كم صورة…
بالبقاع…
منسمع كتير كلمات حلوة ومنردّدها من دون ما نعطيها أهمية…
من الكلمات الغير شكل واللي ما بتصوّر حدا بالغرب بيقولها: “يا بَعْدِي!!!!”.

Alphabet

by admin

بتذكروا غزل البنت الحلوة الزغيري اللي بلّشت مدرسة من جمعتين… بالخَيمة،
Alphabet؟
مبارحة، بعتِتلي رسالة ع موبايلي بكلمتين، تَتقلّي إنها صارت تعرف تكتب:
“غزل… بحبِّك”
في أحلى؟
غ.

– فات الأوان –

by admin

معقول دولة بتعرف شو بدهم ولادها أكتر من دولتنا؟ يعني عم تتكلّف مصاري ألله تتروح تجيب مصاري أكتر من وين ما كان ومن مين ما كان!!
وكل مشروع بتجيبه، بتجيب معه أوانه… ولما منروح تَنراجع بشي مشروع، بكون أوانه فات قبلنا ع المراجعة!
وكل ما بيسألونا شو صار معكم؟ لحّقتوا تفوتوا تراجعوا المسؤول؟
دايماً جوابنا عم بيكون ذاته:
ما لحّقنا! سبقنا أوان وفات قبلنا!!!
غ.

أسَفي

by admin

هيدا لبنان؟
أسَفي ووَجَعي وزعَلي وحرقتي…
عليك يا بلدنا!
غ.

غزل

by admin

بتتذكّروا البنت السورية اللي عمرها ٥ سنين “غزل” اللي عايشة بالخيمة مع أهلها؟
عرفت اليوم إنها بتخبّر أصحابها بالخِيَم حدها وولاد خالاتها إلخ… عن “صديقتها غادة”!
الخبريّة الحلوة إنو بكرا غزل و١٩ ولد غيرها رح يبلشوا بالمدرسة!
والمدرسة هيّ اللي إجت لعندهم!
شكراً لكل شخص ساهم بهالمشروع الإنساني والتربوي ولكل حدا عم بيفكّر يساعد! .

من نهفات الوالدة

by admin

من نهفات الوالدة…
ع الساعة حْدَعِش بالليل، هيّ وإمي عم بتحضّر حالها للنوم، منسمع قواس إبتهاج حوالينا.
وشو بدكُن تقول؟
“شووووو قولِك انتخبوووووا رئيس؟”
تصبحوا ع رئيس .