Soprano Ghada Ghanem's blog
… some of my short stories … شويّ من خباري

مش محمود

by admin

من شي جمعتين،
وقعت إمي وانكسر كتفها… 😔
عم إسألها مبارحة:
“مَحمول الوجع يا إمي؟”
بتجاوبني:
“مَحمول بس مش محمود”
حبيبتي،
👌غ

– الشط لكل الناس؟ –

by admin

نهار موسيقى يابانية
ونهار تاني مظاهرات…
الشّط… ما بقي شي منه
وعم يأشّطونا كل شي
بعد ما أشّطولنا كل شي 😳
وباعتين ناس تراقب مين عم بيطالب بالحق العام !!!
شو هيدا؟؟!! وين التغييييير والإصلاح؟؟؟

– أوعى الملح، هيك قال الحكيم –

by admin

وبعدها الحالة ذاتها… وقّف سيتَرن الميّ بالحيّ اليوم، عّم يبيع ميّ!!!
وسمعت صوت جاري عَم يقول لصاحب السيتَرن (يعني يلّي سارق ميّة الدولة اللي نحنا دافعينلها وعم يرجع بيبيعنا يّاها وما في حدا يحاسبه… وقال شو؟ الله فتحها بوِجُّه):
– “ما تعبّيلي قبل مَ دوقها… هيك نَصَحوني.
يِييي 😳!!! في عندك ميّ غيرها، مِلحها أخَفّ؟ أنا ضغطي عالي!”
– والله يا ريت! بس ليك الكل عَم يشتروها وماشي حالهم!!!

آآآآآخ خ خ
غ

القمر

by admin

نْقَمَرنا…
يُقمُر إمّك ما أهضمَك…
بتُقْمُر قَمِر …
قَمِرنا لألله…
غ😘

– شو العُمر؟ –

by admin

-أنا: حدا شافلي عمري؟
– مش أنا: يِه حدا بيضَيِّع عمره؟ شو هوّ مفتاح؟
– أنا: وعيت وما لقيتُه!
– مش أنا: تذكّري وين كنتِ مبارح ووين آخر مرة حسّيتي فيه أو انتبَهتيلُه!!!
– أنا: مدري وين نسيتُه . ع بِنَا رجعنا سوى ع البيت مبارح… كان ماشي ورايِ ع الطريق.
– مش أنا: هَي أول مرّة بشوف حدا قدّامي مضيّع عمره!
– أنا: إنه تشوفني مضيّعة عمري بعدها أحلى مَ كون مضيعة عقلي !!
هلّق بلا طول سيرة… شو فيك تعملّي؟
– مش أنا: تطَلّعي بعيوني منييييح تَحِطِّلِّك عمر

😜غ

علمانية

by admin

إنه ليش من زمان علمانية أنا، عم تسأل؟
صارلُه زمان طالع ديني… وما عم إحكي.
متل خَرَجَ ولم يَعُد.
غ

– عون رجع… وهَيك إمي –

by admin

– عون رجع… وهَيك إمي –
(حوار صباحي ع الريق عبر الفايستايم مع إمي من أمريكا)
– جوجو: شو إسمه هيدا اللي كان يعزف معك هون وأصله فلسطيني؟
– غ: طوم جابر (كان إستاذي بالجامعة، بهيوستن)
– ج: ميييين؟ يا ربي ليش ما عم إسمع منيح؟ شاكر؟ شامل؟
– غ: (ع صوت أعلى).. طووووم جااااابر
ج: (ع صوت واطي) … كيف صرت هيك يا ألله!!!؟ لا عم إتذكر ولا عم إسمع منيح؟؟؟ ميييين؟ هجّيلي إسمه ع مهلِك!!!!
غ: ليش عم تسألي؟
ج: رحت عملت زيارة اليوم لَسِتّ فلسطينية والهيئة من ضيعته بفلسطين وما كنت إتذكر إسمه!!! يا إمي، راح ع لبنان وعزف بمسرح المدينة…
غ: آآه … سيمون شاهين
ج: إيه إيه هيدا هو!!
غ: شو إسمها السِت؟
ج: (بتُضحك)… يِه ما بتذكر!! (وبتُضحك أكتر)… قال وعزمتني عالغدا الأربعا، انشالله إتذكر وين!

ومن موضوع لموضوع، آخر شي ختَمت الحديث: الهيئة طالع الرجّال رئيس! 😜
غ

– حَرقِصها –

by admin

صار إلي من الصيف لهلّق، مش طابخة ولا طبخة!
معقول مش ملاقية وقت للطبخ؟
آخ، لو بتعرف البصلة، قدّيش مشتاقة حَرقِصها 😜
غ

المفكرة القانونية

by admin

ورحت إبرم إبرم فتّش عن المفكرة القانونية ولا حدا بيعرف وينها!!! لا في أسامي طرقات ولا الناس اللي بالطرقات بيعرفوا هنّي وين ولا الشرطي اللي عم يعطي ظبط بيعرف هو بأي شارع … وآخر شي قال العسكري ما إلِك إلا المختار!!!
رحتلُّه للمختار وسمعوا شو قلّي:
“المفكرة القانونية؟ ما إلك إلا مكتبة أنطوان… عندها كل المفكّرات”
وهيك، رجعت ع البيت من دون ما إحضر المؤتمر الصحفي لشربل نحاس
لشرح المراجعة التي تقدم بها “الاتحاد الوطني لنقابات العمال والمستخدمين في لبنان” أمام مجلس شورى الدولة لإبطال المرسوم 3791 الصادر عن مجلس الوزراء في 30/6/2016 والذي خفض الحد الأدنى للأجر اليومي من 30,000 ل.ل. الى 26,000 ل.ل.
😔غ

حيّرتوه لألله

by admin

سألوني مرة إنتِ لأيّ حزب بِتحسّي حالِك أقرب شي؟
قِلتلّهُم إذا في “حيّرتوه لألله!!!!”، بكون أنا أكيد معهم.
هِنّي كلمتين،
غ