Soprano Ghada Ghanem's blog
… some of my short stories … شويّ من خباري

وينُن

by admin

في كنباية بالصالون عنا. ما حدا منا بيقعد عليها عادةً… إلا الزوّار!
يعني أنا اليوم، أول مرة بقعد عليها!!! ودِغري حطّيت إجر ع إجر.
ومن دون وعي، صرت قول لحالي: شو وينهم؟ تاركين الباب مفتوح وما في حدا منهم؟ معقول؟
… فنطرت شوي ورجعت غيّرت كنباية 😜
غ

– نظام خاطف شعبه –

by admin

– النظام: إذا ما منخطفكم بتقَتّلوا بعض! شكروا الله لقينالكم هالمعادلة!! ما عم بيصير ضربة كف!!
– الشعب: بس وين الحرية اللي عم تتغَنّوا فيها قدّام البلدان؟ وليش مجبورين تعَلبونا بعلب الطائفية؟ وليش مفَرقينّا بمتاريس الطوائف وزعما طوائف؟ وأيمتن بتخلص صلاحيتكم؟
– النظام: بتخلص صلاحيتنا لما الشعب بيوعى وبيرجعوا الناس ع إنسانيتهم وبيتْخَطّوا الخوف اللي زرعناه… وهيدا صعب كتير لأنه الناس بدها معالجة ونحنا ما بدنا نعالجهم!! مش من مصلحتنا!!!
يعني من الآخر:
خاطفنا النظام الطائفي وشاغل ع عقليّة الناس، وبيخَوِّفهم من حرب طوائف! المسيحيين خايفين من الإسلام والإسلام خايفين من بعضهم وكيف بدّك الناس تآمن بدولة قايمة ع تخويف العالم من بعضا؟
مواطنة (عم تحلم) في دولة،
غ

– مار مارون –

by admin

ما كان عِندَك سيّارات آخر طرز؟
ولا كان عِندَك “بَضي غارد”؟
معقول كنت عايش بالجبال وبالوَعر وما كان عِندَك كذا قصر وخدم وعَشّي؟
ما بصدِّق ما كان عِندَك مصاري؟ وما عِندَك حسابات بالبْنوكة ؟؟؟ يِه!!! 😳
يعني مش ضايق ولا مرّة الكاڤيار؟
نوووو واي 😢
متل العادة عم دايماً تِتشقلب الأحرف هالإيام…
صار المطران … بُطران
والناسك صار… ناسي
وبعدهم بيقولوا انهم من رجالَك 😔
وشو؟ بَدّهم الراحة لنفوسهم!!
آخ!
من مارونية عتيقة،
غ

– غمزة زغيرة للبلدية –

by admin

صار رقت نشوف كيف فينا نساعد كل المحتاجين بالضيعة اللي ما عندهم ضمان صحّي، إنه نعملّهم ضمان ونؤمِّنلهم إدوية، خصوصاً اللي كبار بالعمر!!!
سمعت اليوم إنه بلديّة منيارة بعكّار سابقتنا ع الموضوع!
پليز خلّينا سوى نشوف أي سؤال هو الصحيح والطبيعي:
١- كيف زِفتَك؟
٢- كيف حَيط دعمَك؟
٣- كيف قنايتَك؟
٤- كيف صحتَك؟
غ

– تعبير صوتي –

by admin

عطيت صف “تعبير صوتي” لتلاميذ المسرح بالجامعة اللبنانية من كم شهر.
حبّيت بهالصف شجّعهم يقولوا الإشيا مِتل م بيحكوا عادة، يعني بطبيعية، بحقيقية.
وما تفكروا إنه هيدا شي هيّن ينطلب بهالإيّام من الممثلين أو من حيالله حدا!
في تقنيّة، بس بذات الوقت ما لازم تبيِّن 😘
حبّيت أعطيهم حرّية النص، بس مش حرّية الموضوع!
فكان “علاقتكم مع الوقت” هو موضوعنا!
حْضَروا هالنموذج الحلو من الممثلين الجداد!
وشكراً للجامعة اللبنانية اللي عطيتيني الفرصة كون مع هالشباب والصبايا الحلوين 😍
غ

– دَوا الوجع –

by admin

من الإشيا الغريبة اللي سمعت إمي عم بتقولها اليوم للشب اللي عم بيساعدها بالرياضة وبالعلاج الفيزيائي:
” I speak 3 languages and why do I have so much pain?”
“ما بعرف ليش في وجع كتير، مع إني بحكي ٣ لغات”

الهيئة مع دوا الوجع، في الواحد يحكي شو ما بدُّه…
غ

– ترو ستوري –

by admin

– إمي: مبارحة كنت بألف خير. شو صار معي يا ألله؟
– غ: ما ضروري دايماً نكون بألف خير، يعني ما عليه، إذا شوي أقل من ١٠٠٠
– إمي: إذا هيك، لكن أنا اليوم بِـ ٨٠٠ خير. خَيّ ارتحت.
– غ: يعني شوي شوي منرجع نوصل للألف.
غ ☺️ ( مع محاولات غير شكل )

– ابتسمِتلُه إمي للمتنبّي –

by admin

اليوم كنت عم قول لأمي … شو حلو المتنبّي لمّا منفهمُه هو وعم يحكي عن الوجع:
“ألَمٌ ألَمَّ ألَمْ أُلِمَّ بِدائِهِ
إنْ آنَ آنٌ، آنَ آنُ أوانِهِ”

– المريض: يا حكيم، عم إنوِجِع… بس من دون أي مرض
– الحكيم: هيدا خَبَر حلو: لمّا بيتوجّع المريض، يعني قرّب يشفى

غ (لكل حدا موجوع) 🙏

– النُقَط ع غير حروف –

by admin

– عم فكّر هالفترة إنه، النقطة ع الحرف اللي مش ناطرينه، معقول تغيّر كل المعاني ومعقول تكون هيّ الحل 😳… بهالزمن!
يعني بَلكي، كل زمن وعنده نُقَطُه 🤔.
شو بتفيد الحروف … م دام ما بقى في ناس بتقرا، تعى نزِدْلها نقطة وبتصير فيك تحشيها رز وتعمل عزيمة وتطعمي الجوعانين.
ومَ دام في حروب وناس عم تهرب من بلد لبلد… خلّينا نِلغي الحدود، بَلكي منِقضي ع التعتير وع الحيطان اللي رح تتعمّر بيناتنا، ومنصير نتلاقى بآرمات بتقول: الخدود المكسيكية الأميركية، أو الخدود السورية على بعد كذا كلم!!!
ومرّات النقطة لمّا تُقْشُط ع السطر بتكون أقوى من كل شي نقال قبل…
متل غ بتصير: يا ع. 😜

just thoughts

by admin

Sharing some thoughts from my voice studio. This is what I tell my students sometimes:
– please try to kiss every music note when you sing
– … and don’t forget to smile and smile from the inside. Etc.
هيك مرّات بيصير معي أنا وعم علّم الغِناء…
وصَباحو
غ